De Markus Dieth wird Landamme

Wi de Kanton Aargau mitteild, het de Regiirigsrot de Landamme und de Landstatthalter für 2020 gwählt. Wi erwartet isch es erschtmols en Wettiger, wo Landamme wird.

Als primus inter pares fungierd de Landamme als Chef vom Regiirigsrot und de Landstatthalter als sin Stellvertreter. Im Johr 2020 sind di ehemolige Ammanne vo Wettige und Bade. De Markus Dieth isch ab em 1. Januar 2020 Landamme und de Stephan Attiger Landstatthalter. Au s jährlich offiziell Föteli het de Kanton veröffentlicht. De jewils noi Landamme dörf feschtlege, wo s Föteli sell gmachd werde. De Markus Dieth het sich fürs Chloschter Wettige entschiede und d Sandra Ardizzone het d Mitglieder vom Regiirigsrot und d Staatsschriberi, d Vincenza Trivigno, in Szene gsetzt.