Es esch weder so witt. Au das Johr cha mer a diverse Ort go Christbäum chaufe. Mir hend für oich e chlini Uswahl für Wettige zämmgstellt.
Tratitionell esch d KAB uf em Rathuusplatz be de grosse Tanne ah z‘treffe. Det send Nordmanntanne, Blautanne und au die klassischi Rottanne im Angebot. D Bäum chömmed all us de nöchere Region. Send also ned med Lastwage, eng a eng zämebunde vo witt-wegg uf Wettige brocht worde. De Erlös vo dene verchaufte Bäum god je en drittel ad Arwo, ad Mission Brücke – le Pont und anderi.
Göffnet vom 13. Dezember bis am 24. Dezember (24.12 bis ca. 10Uhr), Mändig bis Fritig 9.00-12.00Uhr + 13.30-18.30Uhr, am Samschtig 8.30-17.00Uhr
En wittere Christbaum-Verchauf wo be Gross und Chlii sehr gschätzt und gliebt wird, esch de von de Famile Benz uf em Ziegelhof a de Landstross 227. De findet das Johr am Samschtig 14. Dezember statt.
Uf em Ziegelhof findet mer nebe de Christbäum au no e beheizti Festbeiz, feini Köstlichkeite vom Grill und e Wiehnachtszauber-Bar. Das ganze findet ab de 10i bis öppe um 6i statt. Christbäum send natürlich ab sofort scho erhältlich uf em Ziegelhof!
Nebe dene zwoine Ort get’s natürlich au Möglichkeite uf em Lüscherhof a de unter Geisswiesstross direkt ab Hoflade go Christbäum go chaufe.
Witeri Iichaufsmöglichkeite für Christbäum gits a de Schartestross – nebem Pfarreiheim – au direkt vom Hof, be de Migros a de Landstross, bem Coop im Tägipark, um de Zentrumsplatz ume, und und und…
Uf jede Fall veel Vergnüge bem Ussueche vom schönste Christbaum.