Bi de Iiwohnerrotssitzig vom Donnschtig sind zwöi noii Ratsmitglider in Pflicht gnoh, zwöi Kommissionssitz noi bsetzt und verschidnigi Vorstöss abgschribe worde. Zudem wird de Iiwohnerrot wegem Budget e Sondersitzig ha und de HC Rotwiiss cha de Kunschtrase ernoiere.
Es sich cho, wi mes ufgrund vo de Fraktionsbricht het chönne erwarte: Di bürgerlich Phalanx vo SVP, FDP, CVP und GLP hends Budget zruckgwise. De Gmeinderat muess es jetzt überarbeite und uf Aatrag vo de CVP en Entwurf vorlege, bi dem 4 vo de 5 noie Stüürprozent in de Schuldeabbau flüssed. Wi das sell glinge, bliibd abzwarte.
Diskussione hets au um d Abschriibig vo de Motion vo de Finanzkommission zur Usschriibig vo de Spitex-Leischtige geh. S Kommission het zwar de Bricht vom Gmeindrot begrüessd, aber d Motion welle lah stah, bis d Verhandlige über e noii Leischtigsveriibarig mit de Spitex abgschlosse sind. Mit de Stimme vo EVP/Forum 5430, FDP, GLP und SP/WettiGrüen isch d Motion aber abgschribe worde.
Eistimmig het de Rat s Darlehe über 300’000.- Franke an Rotwiiss Wettige für d Ernoierig vom Kunschtrase i de Bernau bschlosse. En Zuesatzaatrag vom Leo Scherer (WettiGrüen), das de Hockeyclub set prüefe, wi er s CO2 cha kompensiere, het kei Mehrheit gfunde.
Noi im Rat sind de Peter Lütolf (SVP) und d Mia Gujer (SP). I d Finanzkommission isch de Martin Fricker (SVP) und in d Gschäftsprüefigskommission d Ruth Jo Scheier (GLP) gwählt worde.