Zwöi Kandidatinne für d Ersatzwahl vo de Schuelpfläg

Am 12. September 2019 het d Gmeind i de Limmatwelle mitteild, dass de Stefan Spiess (CVP) uf Ändi Johr us de Schuelpfläg zrucktritt. Für sini Nochfolg sind zwöi Kandidatinne aagmeld worde.
D Ersatzwahl für de Sitz i de Schuelpfläg wird am 24. November 2019 stattfinde. Bisher isch no unklar gsi, obs e stilli Wahl oder en Urnewahl wird geh.
Will sowohl d CVP wi au d SVP Kandidatinne aagmelded hend, wird es zuere Wahl cho. Nebe de beide offizielle Kandidatinne, de Nicole Meier Doka vo de CVP und d Sylvia Scherer vo de SVP, cha im erschte Wahlgang jedi i de Gmeind stimmberechtigi Person gültigi Stimme übecho.
D Wahrschinlichkeit isch aber höch, dass eini vo de beide Kandidatinne im erschte Wahlgang s absolute Mehr wird schaffe und somit kein zwöite Wahlgang notwendig wird. Aber s letschti Wort hend natürli d Wählerinne und Wähler.