D Wettigerinne und Wettiger sind zfride mit ihre Gmeinde

E Bevölkerigsbefrogig im 2018 het ergeh, dass 97 Prozänt vo de Befrogte Wettige als Wohnort würded witerempfehle. Das teild de Gmeindrot mit.
Vo Mitti Auguscht bis Mitti September 2018 sind in Zammenarbet mit de Fachhochschuel Sanggalle 1’000 Frageböge nach em Zuefallsprinzip an Iiwohnerinne und Iiwohner verteild worde. 466 sind retour cho und zeichned zum gröschte Teil es positivs Bild vo de Gmeind. Themebereich sind Gmeindverwaltig, Gmeindrot, Information/Kommunikation, Stüüre, Vercher, Läbe i de Gmeind, Entsorgig und Suuberkeit, Schuele, Sicherheit, Gsundheit und regionali Zammenarbet gsi.
In sibe Bereich het d Gmeind Wettige dütlich besser abgschnitte, wi de Durchschnitt vo 50 vergliichbare Gmeinde, in drü numme chnapp schlechter.
Mir hend di fürs Standortmarketing vo de Gmeind zueständigi Sandra Thut gfröged, welli Bereich dütlich überm Durchschnitt (Benchmark) vo de Gmeinde liged. Am beschte schniided Wettige da mit de Stüüre ab, wo d Gmeind «0.42 Pönkt besser als de Benchmark» sig. Bim Läbe i de Gmeind sind es 0.34 Pünkt, bi de Gsundheit 0.16 Pünkt und bim Vercher 0.15 Pünkt.
Knapp unterm Benchmark isch d Gmeind bi Information/Kommunikation , Gmeindrot und Gmeindverwaltig. Dazu hend mir welle wüsse, ob de Gmeindrot in dene drü Bereich Verbesserige wot vorneh. «Jo, de Gmeindrot befasst sech e de nöchste Mönet met de Usarbeitig vo Verbesserige», so d Sandra Thut gegenüber de Wettiger Nochrichte.
Welli 50 Gmeind für de Vergliich bizoge worde sind, het d Sandra Thut ned chönne säge: «Os Dateschutzgründe send eus vo de Fachhochschule nome die jewillige Gsamtzahle pro Kanton metteilt worde. E detaillierte Ufstellig vo de Gmeinde stoht eus somet ned zor Verfüegig.»
Bestätiged gfüehlt het sich de Gmeindrot au bi de Frog vo de regionale Zammenarbet und ere allfällige Fusion: Drü Viirtel hend aageh, dass si e regionali Lösig vo bschtimmte Ufgabe favorisiire, wohingäge numme 16 Prozänt e Fusion mit andere Gmeinde begrüesse würded.