De Iiwohnerrot het geschter d Saniirig vo de untere Landschtross bschlosse

Unteri Landstross

D Iiwohnerrotssitzig vom 14. März 2019 isch rekordverdächtig kurz gsi. Scho um 20.19 Uhr het de Präsident Gögi Huser d Sitzig gschlosse. Vorher isch aber heftig diskutiird worde.
D Saniirig vo de untere Landschtross isch, bi aller Kritik an Details vo de Vorlag, unbeschtritte gsi. D Differenz zwüsche de Kreditsumme und em Betrag, wo im Finanzplan iigschtellt gsi isch, het ebeso zu Diskussione gführt wi de Zuestand vo de Kanalisation, d Bäum und d Bänkli. Aber letschtendlich isch s Kreditbegehre mit 36 Ja-Stimme bi 2 Nei vo SVPler und 4 Enthaltige (je zwöi vo de CVP und de GLP) dütlich aagnoh worde.
Danach isch es ums Grüenstadtlabel Schwiiz gange. Das iizfüehre hend di beide Iiwohnerröt vom Forum 5430 mit ere Motion gfordered gha. De Gmeindrot het ihri Motion zur Ablehnig empfohle, wil er uf de eine Site d Uffassig het, scho gnueg in dem Bereich z unterneh und zum zwöite said, me chönnd d Koschte zum jetzige Ziitpunkt ned abschätze. D Fränzi Widmer (Forum 5430) het in ihrem Votum betond, dass es Wettige, wo sich ja Gartestadt nennd, guet würd z Gsicht stah, s Grüenstadtlabel umzsetze. Meh Grüen hetti aber en schwere Stand z Wettige, das hetti sich au bi de letschte Iiwohnerrotssitzig zeiged, wo en Vorstoss zu «Meh Natur z Wettige» mit em Stichentscheid vom Präsident sig abglehnt worde. Si het d Motion dann zruckzoge, aber betond, dass d Fraktion am Thema dra bliibe wird.
D Diskussion über di beide Motione zu de Chinderbetroiig, wo vili im Vorfäld mit Spannig erwarted hend, isch dann ganz anderscht gloffe, wi vermuetet. Di erscht Motion «Aaleitig zuere Umsetzig vo bedarfsgrechtem Aagebot an familieergänzende Betroiig» het d Yvonne Hiller (GLP) nacheme emotionale Votum zruckzoge. Damit isch es gar ned erscht zuere Diskussion cho. Aaschlüssend isch di zwöit Motion vo de Yvonne Hiller zur Chinderbetroiig traktandiirt gsi. De Gmeindrot het d Motion «Aagebot und Aameldeprozedere vo de Chinderbetroiig» als weniger verbindlichs Poschtulat welle entgegeneh, womit d Motionärin iiverschtande gsi isch. Dademit het es chönne ohni Diskussion überwise werde. Dann het aber de Christian Wassmer (CVP) – wi sich spöter zeiged het – us taktische Gründ d Überwisig beschtritte. Dodemit ischs Fäld frei gsi für e Diskussion. Und di het de Christian Wassmer gnutzt. Ineme realtiv lange Votum het er erklärd, warum ihn di Vorstöss vo de Yvonne Hiller hässig gmachd hend. D Gmeind hetti nämli in de letschte Johr enormi Fortschritt gmachd. Vor gar ned eso lange Ziit hets no gheisse, Blockzite iizführe sig unmögli und in de Zwischeziit hend si sich, nach harte politischer Arbet, etabliird und in de letschte drü Johr hettis ned emol meh e Wartelsicht für de Tagesstern geh. Us sinere Sicht sig d Motionärin uf populistischem Stimmefang. (De volle Wortlut cha me dann im Protokoll vo de Sitzig nocheläse, we de Iiwohnerrot es in sinere Mai-Sitzig gnehmiged het.) Nach kurze witere Wortbiträg vo andere Iiwohnerröt het de Christian Wassmer sin Aatrag uf Rückwisig zruckzoge, so dass s Poschtulat ohni Abstimmig überwise worde isch.
Di beide Interpellation sind zu de Zfrideheit vo de Interpellante beantwortet worde, so dass em Iiwohnerrotspräsident numme no blibe isch, d Titel vo de noi iigreichte Vorstöss z verläse und nach guet Föifviirtle Stund d Sitzig für beended z erkläre.