D unter Landschtross muess saniirt werde, da sind sich alli Fraktione einig. Über s Wi und Was gönd Aasichte aber usenand, wi en Blick in d Fraktionsbricht zeigd. So dörfd d Diskussion morn, 14. März 2019 ab de Sibni am Abe im Iiwohnerrot spannend werde.
De stärkscht Widerstand gege d Saniirig chund vo de SVP und de GLP. D Fraktion SVP isch zwar für d Saniirig vo de Kanalisation, aber gege di im Masterplan Landstross feschtglegte Ufwertige vo de untere Landstross, also gege d Bäum und gege d Bänkli, wo ältere Mönsche d Möglichkeit zum Pause mache würd geh. Zudem schribd d Fraktion, dass d Massnahme widerkehrendi Choschte für de Unterhalt zur Folg hetted. D Fraktion GLP het au grundsätzlichi Froge und bezwiifled d Dringlichkeit vo de Saniirigsmassnahme.
Anderscht gsehts d Fraktion FDP. Si isch sowohl für d Saniirig wi für d Massnahme vo de Ufwertig vom Abschnitt zwüschem Rabekreisel udn de Stadtgränz zu Bade. D Fraktion stört sich aber dra, dass d Saniirig im Finanzplan mit ere dütlich tüüfere Kreditsumme iigsetzt isch (3’250’000.- Franke), wi jetzt i de Vorlag.
Für di plandi Saniirig und d Massnahme, wo im Kreditaatrag ufgführt sind, sind di andere drü Fraktione. D Fraktione EVP/Forum5430 und SP/WettiGrüen begrüessed vor allem d Ufwertig für de Langsamvercher und s Grüen, wo d Stross sell begleite. D Fraktion CVP betond vor allem d Busbuchte, wo meh Sicherheit bringed, au für d Fuesgänger. De höcher Kreditbetrag isch für d CVP e Folg vom Iibezug vo de Iimündige i d Querstrosse und dodemit nachvollziebar. D Formuliirig «d Fraktion stimmi em Kreditbegehre vo 10’930’000.00 Franke grossmehrheitlich zue» laht offe, wi gross d Unterstützig für s Kreditbegehre bi de Fraktion würkli isch.
Wer genau wot wüsse, wis morn laufd, chunnd am beschte ab de Sibni uf d Tribüne vom Rothuussal.