Am Samschtig, 2. und Sonntig, 3. Februar 2019 findet s’Hallenmasters i de Schwiizer Hallehockey-Meischterschaft i de Sporthalle Tägerhard z’Wettige statt. Sowohl bi de Fraue als au bi de Herre hät sich Rotwiiss Wettige für das Finalturnier vo de beschte vier Hallehockeyteams aus de Schweiz qualifiziert.
D’Wettigerinne händ de Izug is Halbfinal ohni Verluschtpunkt, mit eme Torverhältnis vo 74:4, gschafft und träffed als Titelverteidigerinne und Meischterawärter am Samschtig am Nomittag am 2. im Halbfinal uf d’Fraue vom Basler HC. S’Ziel vom Trainer Chris Elste isch mit em erneute Schwiizermeischtertitel klar definiert. Das wär denn de „magischtrali“ 13. Titel in Serie!
A de letschte beide Meischterschaftsrunde händ sech au d’Männer mit indrückliche Siege ebefalls als Tabelle-Erschte för das Finalturnier qualifiziert und ihr Ambitione auf de Titel agmäldet. Das i dere Saison schtark verjüngti Team trefft am Samschtig am halbi vieri im letschte Halbfinalschpel ebefalls uf de Basler HC.
Die Halle-Endrundi verheisst Hockeysport uf em höchschte Niveau. Beidi Mannschafte vo Rotwiiss Wettige freued sech, möglichscht veli Zueschauer im tägi chöne z’begrüesse ond hoffed uf lutschtarki Unterstützig. S’erschte Halbfinal werd am 11i apfiffe.
Agenda
Samschtig, 2. Februar 2019
11:00 h Halbfinal Fraue: Luzerner SC – HC Olten
12:30 h Halbfinal Männer: Luzerner SC – HC Olten
14:00 h Halbfinal Fraue: HC Rotweiss Wettingen – Basler HC
15:30 h Halbfinal Männer: HC Rotweiss Wettingen – Basler HC
Sonntig, 3. Februar 2019
11:00 h Platz 3./4. Fraue
12:30 h Platz 3./4. Männer
14:00 h Finale Fraue
15:30 h Finale Männe
Monika Wälti