Dass e Saniirig vom Sport- und Erholigszäntrum Tägerhard (Tägi) notwendig isch, isch unbestritte. Wivil Gäld me dadefür wot in d Finger neh aber scho und wird’s wohl no di nächschte Johr bliibe.
Schpöteschtens sit de Diskussione im Vorfäld vo de Abstimmig übers erschte Kreditbegehre zur Saniirig und Erwiterig vom Tägi, isch s Thema umstritte. Bi dere Abstimmig vom 23. September 2012 het d Stimmbevölkerig s Kreditbegehre dütlich abglehnt. Di zweit Kreditvorlage mit eme Volume vo 46’530’000 Franke isch am 27. November 2016 vo 58.01 % vo de Stimmende dütlich aagnoh worde. Gliichwohl hets immer wider Kritik geh, au was e möglichi Überschritig vom gnehmigde Kredit aagoht. Ob d Kritiker rächt bhalte, was en allfälligi Choschteüberschritig aagoht, wird me erscht genau wüsse, wenn nach de Saniirig d Schlussabrechnig vorligd. Es isch aber hüt scho klar, dass in bstimmte Beriich dütlichi Mehrchoschte aafalle, wo bisher numme es Stück wit hend chönne kompensiirt werde.
Durch d Antworte uf en Interpellation, wo am 24. Jänner 2019 im Iiwohnerrot behandled wird, liged konkreti Zahle vor. Durch d Komplett-Saniirig vom Schwümmbecki für 2’450’000 Franke, wo vorher ned eso planed gsi isch, und witere Projektänderige, sind bisher Mehrchoschte inere Höchi vo 4‘415‘000 Franke aagfalle, schriibd de Gmeindrot in sinere Antwort uf d Interpellation. Au Minderchoschte hets geh, nämli 918‘000 Franke. Das git zämme immer e Mehrbelaschtig vo 3‘497‘000 Franke.