Ab em 1. Jänner 2019 tritt di evangelisch-reformiirti Chilegmeind Wettige-Noiehof mit de gmeinsame Wortmarke vo de reformiirte Chile uf. De Güggel blibt erhalte, wechselt ab d Farb vo grüen uf blau.
Im November 2017 het d Synode (also s Parlament) vo de Reformiirte Landeschile Aargau bschlosse, dass es e noii gmeinsame Wortmarke für alli Chilegmeinde wird geh. Iiführe müend d Chilegmeinde d Wortmarke innerhalb vo sächs Johr und dörfed si mit emem Logo ergänze, wo vom Erschinigsbild muess zur Wortmarke passe.
D Chilepfläg vo de reformiirte Chile(gemeind) het bschlosse, Wortmarke und ergänzendes Logo ab dem. 1. Januar 2019 iizführe. Au s Infoblatt für de Jänner, wo uf de Homepage scho ufgschalte isch, isch im noie Design.
De Grund für d Iiführig vo de Wortmarke «Reformierte Kirche» in ere einheitliche Schrift und farbgebig im ganze Kanton, isch de Wunsch, d Sichtbarkeit und d Widererkennig vo de reformiirte Chile und ihre Agebot und Leischtige z erhöche. Ufgrund vo de höche Mobilität, isch das wichitg.
Um d Widererkennig au über d Kantonsgränze use z ermögliche, isch s Erschinigsbild ähnlich ufbaud wi das vo de «Reformiirte Chile Kanton Züri»
Zum noie Erschinigsbild vo de Chilegmeind gehört nebe de Wortmarke au es nois Layout bi de Drucksache, Visitecharte, Plakat und andere Publikatione. Numme bi de Website wird d Aapassig no e chli Ziit bruche, wil si eh grundlegend sell überarbeitet werde.
