S ganze 2020 sell es Jubiläumsjohr werde. De Höhepunkt wird aber im Auguscht si.
S ganzi Jubiläumsjohr wird unter em Motto „Atmosphäre“ stah, wobi de Höhepunkt s grosse Jubiläumsfäscht zwüschem 14. bis em 23. Auguscht 2020 si wird. Es wird bim Magelächer, uf de Zirkuswise und bim Tägi stattfinde. Verei wo wend mitmache, chönnd sich ab em 1. Februar 2019 über d Homepage bewerbe. Aameldeschluss isch am 30. Juni 2019. Nach de Uswertig durchs OK werded d Fäschtplätz zueteilt. Alli, wo wend, sette en Platz übecho.
Nebem grosse Fäscht sell es jede Monet Veraastaltige geh, mit dene d Gmeind d Iiwohnerinne und Iiwohner wot unterhalte. Daderbi sind Thememönet planed, wo ganz verschidnigi Beriich selle abdecke. Vom Begegnigs-, über en Sport-, Musik-, Garte- und Kulturmonet, bis hin zu Multi-Kulti-, Generatione- und Umwältmonet isch bi de Präsentation am 12. Dezember 2018 alles gennd worde.
De Iiladig vom OK, wo vom Alt-Iiwohnerrotspräsident Paul Koller präsidiirt wird, sind öppe 110 Verei und Vereinigunge gfolged, so dass de Rothuussaal mit meh wi 160 Persone guet gfüllt gsi isch.
Nach em Aameldeschluss für d Teilnahm am Fäscht im Auguscht wird es im September 2019 di nächscht Inforveraastaltig geh.