Bi de «Budgetgmeind» vom Tsischtig, 27. November 2018, het d Chilegmeind s Budget gnehmiged. Zudem hets zum Änd vo de Amtsziit diversi Verabschidig geh. Im Fokus gschtande isch aber di künftig Entwicklig vo de Chilegmeind und ihre Ligeschafte.
D Zuekunftsussichte sind im Blick uf d Mitglider und d Finanzen ned di beschte, aber grad deshalb bruchts e vorausschauendi Planig, so de Pfarrer Lutz Fischer-Lamprecht bi sinere Präsentation, wil «me jede Franke numme einisch cha usgeh». Als Präsident vo de Immobiliekommission het er d Ufgab übernoh gha, di 70 aawesende Chilegmeindsmitglider über d Entwicklig vo de letschte 10 Johr im Blick uf d Mitglider und d Finanze z werfe, aber au en Blick fürschi. Allei ufgrund vo de Mitgliderpyramide, wo ehnder wi e Zibele usgseht, zeiged sich, dass au ohni Chileustritt d Zahl vo de Mitglider witer retour wird gah. Früher oder spöter würdi sich das au uf de Stüürertrag uswürke, was sich au im Trend vo de letschte Johr zeiged het. Bisher het me uf di Entwicklig v. a. mit Szelleabbau reagiirt, wil aber di zahlriiche Gebäud tüür im Unterhalt sind und eigentlich z wenig bruuchd werde, wird zur Ziit de Immobiliebriich intensiv analysiirt, so de Fischer-Lamprecht. Er het d Aawesende ufgfordered, Idee schriftlich bi ihm iizreiche, wo ufzeiged, wi me di sinkende Finanze mit de Gebäudenutzig chönnd in Iiklang bringe.
D Versammlig het das vom Chilepfläger Peter Müri präsentiirt Budget aagnoh und de scheidend Chilepfläg-Präsident het abtretendi Chilepfläger und de Synodal Urs Quenzer erabschidet, bevor er selber vo de Vizepräsidentin Iris Baroncelli ebefalls verabschiided worde isch.
Begrüessd worde sind au di noi gwählte Chilepflägmitglider, so dass em erfolgriiche Start in di nächscht Amtsperiode nüd im Wäg stoht.