Am letschte Mittwoch, 12. September 2018 het im Museum Eduard Spörri de traditionell Aalass stattgfunde, wo vom Museum gmeinsam mit de Wybaugnosseschaft Wettige organisiird und duregführd wird. Sowohl künschtlerisch wi für de Gaume isch es e Froid gsi.
S Museum Eduard Spörri fiired i dem Johr sin 10. Geburtstag. Unter em Motto FIGURATION stelled alli Künschtler us, wo in de letschte Johr im Museum usgschtelld hend. Vo de Künschtlerinne und Künschtler isch de Gianfranco Bernasconi, aawesend gsi, en Künschtlerfründ vom Eduard Spörri, wo au s Etikett vom aktuelle Künschtlerwy vo de Wybaugnosseschaft entworfe het. Im lockere Gschpröch mit dem Kurator vom Museum, em Ruedi Velhagen, het de Bernasconi einigi Gschichte us em Läbe vom Eduard Spörri verzällt. Nach ere Führig durch d Usstellig isch de Wy zum Thema worde und d Bsuecherinne und Bsuecher hend chönne degouschtiire, was de Kellermeischter Meinrad Steimer z biete gha het.
Wer selber de Wy wot degouschtiire muess sich an d Wybaugnosseschaft wende, wer aber d Werk vo de Künschtler wot gseh, cha bis und mit em 2. Dezember 2018 jewils am Samschtig und am Sunntig vom Zwöi bis um Föifi am Namittag s Mueseum gah bsueche. Nebem Werk vom Eduard Spörri sind bi de laufende Usstellig au Werk vom Gianfranco Bernasconi, em Christoph Brünggel, de Nora Dreissigacker, em Dieter Hall, em Kurt Hediger, em Marc Leroy, em Eugen Maurer, de Victorine Müller, de Ruth Maria Obrist, em Erwin Rehmann, de Ursula Rutishauser, em Lukas Salzmann, em Paul Takács, em Adolf Weber und vom Werner und de Ruth Wälchli z bestuune.
