De FC landed en 8:0-Erfolg

Letschte Samschtig, 8. September 2018 het de FC Wettige im altehrwürdige Stadion Alteburg de FC Wange b. Olte z Gascht gha. Us Wettiger Sicht isch de Match fascht perfekt gsi.
En 8:0-Erfolg isch selte, zumal wenn es kein Fründschaftsmatch isch, sondern de Gegner in de gliiche Liga tschutet. Em FC isch es am letschte Samschtig vergönnd gsi, so en super Erfolg z realisiire. Scho in de 9. Minute isch d Heimmannschaft durch es Goal vom Kürsat Kiybar in Führig gange. MIt emem Doppelschlag i de 34. (Anthony Gullo) und de 35. Minute (Kürsat Kiybar) isch eigentlich vor de Pause scho viles klar gsi. Aber zur Froid vo de Zueschauer, isch de Torreige dadermint no nöd vorbi gsi. In de 2. Hälfti sind föif Goal gfalle, alli für de Gschtgeber, In de 48. Minute het de Boris Dabic es Goal gschosse, in de 52. de Anthony Gullo sis zwöite. In de 62. und de 65. Minute het de Kürsat Kiybar sini Goal No. 3 und 4 gschosse, bevor de Jan Lanz in de 83. Minute zum 8:0-Ändstand troffe het. De FC Wettige het dadermit sini Position im erschte Tabelledrittel chönne fäschtige und stoht wege de wenige Strafpünkt – jedefalls bis zum nächschte Wochenänd – uf em 3. Tabelleplatz vo de Gruppe 5 vo de 2. Liga interregional.