In de letschte Woche vo de Sommerferie sind d Könfis vo de reformiirte Chilegmeind mit em Pfarrer Lutz Fischer-Lamprecht uf d Hallig Hooge im nordfriesische Wattemeer. Bsunders d Wattwanderig het di Jugendliche begeischtered, während d Heireis zuere physische und psychische Herusforderig worde isch.
Uf de Hallig hend d Konfirmandinne und Konfirmande de gröschti Teil vo ihrem Konfunterricht gha, wo unter em Motto «Horizonte» gschtande isch. Und der isch bi allne Teilnehmer dütlich erwitered worde. Uf em Wäg i de Norde isch es zerscht mit der Nachtzug is Hamburg gange und vor de Witerreis het en Bsuech i de Bahnhofsmission ufzeid, wi chrischtlichi Freiwilligenarbet en ganz wichtige Biitrag für d Allgemeindheit cha leischte. Danach het d Reisegruppe bi ere Stadtführig vom Jungfernstieg zu de Elbphilharmonie ihre Horizont erwitered. Nach ere fascht 24-stündige Aareis sind alle am Abig gsund und müed uf Hallig Hooge aacho. Endlich hets «richtigs» Ässe und es «richtigs» Bett geh.
S Thema «Horizonte» het super zum wite Horizont passd, wo me uf Hooge in alli Richtige het. Flacher goht ned! Bsunders idrücklich isch di Wite bi de Wattwanderig uf de Japsand worde. Nume Wasser, troche gfallene Meeresbode, Sand, Himmel und Wolke het me chönne gseh. De witeri Unterricht isch vo verschidnige Läbesgschichte prägd gsi, aber au vo de Frog nach gwaltfreie Kommunikation und vo dem, wo mir superguet chönnd.
D Lagerwoche isch schnell vorbi gange und bi de Abfahrt het niemed denkd, dass d Rückreis zumene chline Abetüür würd werde. Scho uf em Wäg uf Hamburg isch de Zug überfüllt gsi, will numme 4 vo de 6 Wäge hend chönne bruuchd werde. Z Hamburg hets dann noch e Haferundfahrt und en Bsuech bim «Dialog im Dunkeln» geh, bevor es mit em NightJet zruck in d Heimet het selle go. De reserviirt Ligewage isch aber nöd umme gsi und de Zughalt z Bade het d SBB kurzerhand gschtriche. Wo de Zug dann gliichwohl z Bade ghalte het, isch es rächt hektisch worde, aber zum Schluss sind dann doch alli am Bahnsteig gschtande und hend sich, nacheme iidrückliche Lager mit vilne Erläbnis, wo noii Horizonte eröffned hend, chönne vonenand verabschide.