Abgseh vo e chli Niiselräge geschter am Abig isch es scho lang troche. Teilwiis müend d Buure Pflanze wässere, aber problematisch isch d Situation no nöd.
Sit Woche werded mir vo beschtem Sommerwetter verwöhnt, z erscht vor allem für di, wo es gern heiss hend, sit d Bise blosst, me für di, wo Temperature über 25° Celsius nöd eso guet möge verliide. So oder so fählt de Räge und d Gmeind het zum Bischpil a de Staffelstrass aagfange jungi Boim z wässere.
Mir hend bi de Buure und bi de EWW AG aagfröged, ob und wenn ja welli Uswirkige s trochni Wetter für sie het. Grösseri Problem gits niened. Bi de Räbe, so de Winzer Meinrad Steimer, tuet s Gras «e chli lampe ond wachst nümme so starch. Die ältere Räbe händ langi Wurzle ond holed sWasser tüüf im Bode. Die jüngere Räbe wo dWorzle nöd so tüf händ chönntet dänn scho einisch knapp Wasser ha.» Dann müesst me si mit öppe 5 Liter alli 7-10 Täg wässere. Bi de 3-5 jährige Räbe sigs schwiriger gnueg Wasser ane zbringe. «Ab 6-jährige Räbe macht Trocheheit nüt», so de Steimer gegenüber de Wettiger Nochrichte. Au de Tobias Lüscher vom Lüscherhof gseht no kei Probläm. Fürs Heue sig s Wetter super und au bi de Chriesi, sig s Wetter vo Vorteil. D Frücht, wo bi Räge und Gwitter schnell emol ufplatzed, siged i dem Johr hervorragend. D Erdbeeri müend alli drü Täg bewassered werde, aber das betreffi numme en chline Teil vom Fäld. Überhaupt sigi es schöns, trochnigs Johr immer besser wi es regnerischs.
De Andi Benz vom Zigelhof hend mir speziell nach em Mais gfröged, will ja s Maislabyrinth am 9. Juli 2018 wot sini Tor öffne. Wässere muess er nöd. Wil er de Mais früeh usgsät het und d Maissame per Streifefrässaat in de Bode brochd worde sind, hend d Pflanze gnueg Wasser.
Au de Gschäftsleiter vo de EWW AG, de Peter Widerkehr, gseht kei Probläm. De Wasserverbruuch z Wettige sig zwar im Momänt höch, wi immer im Sommer, aber würd mit em Beginn vo de Sommerferie wider abneh. Zur Ziit isch über 95% vom Wettiger Wasser Grundwasser und da sig de Wasserspiegel konstant guet und stabil. Bis sich Trocheheit da würdi uswirke, gängdi es Monate. Anderscht gseht bim Quellwasser us. Da isch de Ertrag fescht zruckgange, was aber in de Sommermönet normal sig. Es git mit de Wasserversorgig z Wettige also kei Probläm!