Am Tsichtig, 26. Juni 2018 het im reformiirte Chilegmeindhuus d «Sommergmeind» vo de reformiirte Chilegmeind Wettige-Noiehof stattgfunde. Nebe de Gnehmigung vo de Jahresrechnig isch en Vaterschaftsurlaub bschlosse worde und Margrit Wahrstätter isch eistimmig in d Chilepfläg gwählt worde.
Zur Iistimmig het de Organischt Stefan Müller di Aawesende mit Kläng uf em Spinett erfroit bevor de Präsident vo de Chilepfläg, de Roger Vogler durch di traktandiirte Gschäft gführt het. De Finanzverantwortlich Peter Müri het d Rechnig erlütered und di Abwichige vom Budget erklärt. Au uf de sorgsam Umgang mit de FInanze het er anngwise, sind doch durchweg alli Kontegruppe unterm Budget gläge, leider au d Stüüriinahme. Gliichwohl het es für en chline Überschuss glanged. D Rechnig isch aaschglüssend diskussionslos gnehmiged worde. Nach em Brichd vo de Synode und
Uf Aatrag vom Heiner Studer het d Chilepfläg d Iiführig voneme 5-tägige Vaterschaftsurlaub vorgschlage, was vo de Chilegmeindsmitglider ebefalls ohni Diskussion und eistimmig gnehmiged worde isch.
Nach em Bricht vo de Synode und Informatione über di noi bildeti Gruppe «Fachplanig Baute» isch de Fred Hofer als Chilepfläger verabschiided worde. Nach 7 ½ Jahr isch er es halbs Jahr vor em Ändi vo de Amtsperiode zruckträte. Zu seinere Nachfolgerin isch eistimmig d Margrit Wahrstätter gwählt worde. De Präsident het si mit Blueme härzlich willkomme gheisse. Z Wettige isch si kei Unbekannti, isch si doch Grossrötin gsi, erschti und bisher einzige Iiwohnerrotspräsidentin und Co-Leiterin vo de HPS .
De Roger Vogler het dann au scho en Blick uf d Gsamternoierigswahle im Herbst gworfe. Am 23. September 2018 werded d Mitglider vo de Chilepfläg, d Synodale, d Sozialdiakon und d Pfarrerinne und d Pfarrer für di noi Amtsperiode 2019/2022 gwählt. Für d Chilepfläg werded drü Persone nüm zur Wahl aaträte: de Stephan Wehrli, d Ruth Lichtsteiner und de Präsident Roger Vogler. Nebe de Margrit Wahrstätter, wo noi als Präsidentin kandidierd, sind de Jörg Laaser, d Maja Padiyath und de Nico Wegmüller zur Wahl vorgschlage. Für e witeri Amtsperiode kandidiered für d Chilepfläg de Christian Forrer, d Iris Baroncelli, d Regula Gysel Oderbolz, d Angela Mannarino und de Peter Müri, für die Pfarrämter de Stefan Burkhard, d Kornelia Baumberger-Dängeli, de Lutz Fischer-Lamprecht und d Renate Bolliger, für d Sozialdiakonie de Michael Schatzmann und d Yvonne Keller und für Synode de Lutz Fischer-Lamprecht, de Roger Vogler und d Regula Gysel Oderbolz. De bisherig Synodal Urs Quenzer tritt nüm aa, will d Chilegmeind en Synodesitz verlore het.