D Gmeind het d Kehrichtabfuhr öffentlich usgschribe. Somit isch schints klar, dass de Werkhof ab em 2019 nüm für d Kehrichtentsorgig zuständig isch.
Im Newsletter und uf de Website het d Iiwohnergmeind d Usschribig vom Abfuhrwese als Ganzes veröffentlichd. Nebe de Abfuhr vom Huuskehricht, wo je nach Wohngebiet am Tsischtig oder Donnschtig iigsammlet wird, betrifft es au d Gruenabfuhr am Mittwoch und d Sperrguetabfuhr. Damit isch au klar, dass es für d Firma Obrist, wo bisher im gröschte Teil vom Gmeindgebiet für d Grüenguetabfuhr verantwortlich isch, «alles oder nüt» heisst. Entweder d Firma machd bi de Usschribig mit und cha bi eme allfällige Zueschlag s ganzi Abfuhrwese überneh oder si verlürd au d Grüenabfuhr. De Thomas Benz vo de Firma Obrist het uf oisi Aafrog hi gmeind, das sig es ganz normals Verfahre. Mengsich chämti öppis dazue, mengisch würd me au mol en Uftrag verlüre. Zur Usschribig vo de Gmeind Wettige het er no nüd chönne säge, di würdi erscht am Mentig prüefd. Oisi Aafrog bi de Gmeind, obs en konkrete Aalass für d Usschribig git und ob bimene günschtige Aagebot d Sackgebühre würded gsenkt werde, isch am Fritig nüm beantwortet worde. Interessant isch us oisere Sicht au, dass d Gmeind de zukünftig Leischtigserbringer dazu verpflichted, di bisherige Kehrichtfahrzüüg z überneh (vgl. Punkt 16 vo de Usschriibig) und dass d Entfärnigsaagabe vo Wettige zu de KVA Turgi und zur Aalag Otelfinge vo de Axpo Kompogas AG nöd stimme. Uf Turgi isch es numme öppe halbs o wit, wi in de Usschribig aageh und au bis Otelfinge sinds kei 10 Kilometer (Aahang 1 Punkt 1, lueg unte)
.
