D Holzbrugg, wo sit em 1818 /19 Wettige und Noiehof mitenand verbinded, isch sit Johr imene schlächte Zuestand. Jetzt sell si saniirt werde.
D Holzbrugg isch eini vo de sibe Verbindige, wo s zwüsche Wettige und Noiehof über d Limmig git und si isch mit 200 Johr di ältischt. Was me sich hüt fascht nüm cha vorschtelle isch, dass si bis im 1970 d Hauptverbindig zwüsche Wettige und Noiehof gsi und zu de Kantonsstrass ghört het. Si ghört no hüt em Kanton und stoht sit em 1972 unter Denkmalschutz. Nach de Saniirig, wo lut Traktandebricht vom Iiwohnerrot guet 2’600’000.- Franke wird choschte, sell d Brugg in de Bsitz vo de Gmeinde Wettige und Noiehof übere go.
Im Momänt isch d Holzbrugg (eigentlich immer in Kombination mit de Stahlbrugg vo 1886 z denke) imene kristische Zuestand und d Saniirig isch dringend, um d Brugg z erhalte. D Erstellig vomene Massnahmekonzept mit em Koschtevoraaschlag für d Saniirig isch scho erfolged und isch vom Kanton zahld worde. Di eigentlich Saniirig, wo 2’605’000.- Franke wird choschte, wird zwüshem Bund, em Kanton und de Gmeinde Wettige und Noiehof ufteild. De Bund finanziirt us em Fonds für historischi Vercherswäg (IVS) 630’000 Franke und vom Rescht wird de Kanton 75% zahle und d Gmeinde müend jewils 12.5% überneh. De Iiwohnerrot vo Wettige wird bi de nächschte Sitzig das Gschäft behandle und somit über en Betrag vo 246’875 Franke müesse entscheide.
