D Lego-Woche isch vorbi

Vom Tsischtig, 17. bis zum Fritig, 20. April 2018 hend fascht 90 Chind us Würenlos, Noiehof und Wettige im reformiirte Chilegmeindhuus e Legostadt baued. Morn fiired si mit ihr Familie und allne, wo wend cho, zum Abschluss en Gottesdienscht.

Wer Lego liebd und nöd derbi gsi isch, het definitiv öppis verpasse. Meh Lego wi es i de letschte Täg im Chilegmeindhuus geh het, gseht me vilicht numme im Legoland. Und so sind uuzähligi Chind jede Tag froidig ins Chilegmeindhuus cho, hend mitenand gsunge, bätet, Gschichte ghörd und ebe e ganzi Legostadt baued. Es het Hüüser, es Stadion, en Buurehof, en Friidhof, Hochhüüser, e Chile und viles meh geh. Aaluege cha me di Stadt morn, Sunntig, 22. April, bim Apéro nach em Gottesdienscht (Beginn: 9.30 Uhr), bevor si dann wider abbaud wird und an eme andere Ort zum Iisatz chunnd.

Organisiird hend di Lego-Woche di reformiirte Chilegmeinde Wettige-Noiehof und Würelos mit em Sozialdiakon Michael Schatzmann und de Sozialdiakonin Irina Rindlisbacher zämme mit em Marc Lendenmann vom Bibellesebund. Zudem sind ganz vili Freiwilligi im Iisatz, ohne di es nöd möglich gsi wär, di Woche durezführe.