D EVP wirft en Blick zruck ufs Wahljohr

Mit de Generalversammlig isch d EVP Wettige-Limmattal ins Johr 2018 gschtarted. D Wahlziil het d Partei numme teilwiis erreichd.
Alli zwöi Johr finded bi de EVP Wettige-Limmattal Vorstandswahle statt, so au i dem Johr. Föif biherigi Vorstandsmitglider sind wider gwählt worde. De Lutz Fischer-Lamprecht bliibd Präsident, de Lukas Rechsteiner Kassier und d Hanna Läng, d Marie Louise Reinert und d Helen Suter Bisitzerinne. De Präsident het de Heidi Fausch (Aktuarin, Killwange) und de Karin Gellert (Vizepräsidentin, Wettige) für ihri langjährig Arbet im Vorstand danked. Ihri bisherige Ufgabe werded im Vorstand intern noi verteile.

D Partei het au uf d Gsamternoierigswahle vom letschte Herbscht zruckglueged. S Ergäbnis vo de Iiwohnerrotswahl isch guet gsi. D EVP het ihri drü Sitz chönne verteidige und en Stimmezuewachs realisiire. Gfroit het sich d Partei au über de Sitzgwünn vom Fraktionspartner Forum 5430. Au d Wahl vom Lukas Wampfler zum Ersatzmitgliid vo de Stüürkommission het d Partei gfroid. De Sitz i de Schuelpfläg het d Hanna Läng wege de Verchliinerig vo de Behörde ned chönne verteidige und au s Schitere bi de Gmeindrotswahle isch Schad gsi. De Präsident het de Hanna Läng für ihres viirjährigi Wirke in de Schuelpfläg verdankd.
D Stimmig isch bi de GV guet gsi und d EVP-Mitglider, vo dene meh wi d Hälfti isch aawesend gsi, hend positiv in d Zuekunft glueged. Mit de EVP isch witerhin z rächne! Im Johr 2018 sind 2-3 thematischi Spaziirgäng planed, dismol mit em Schwärpunkt «Kunscht und Kultur». Wil im i kei Wahle stattfinded, wird d Regionalpartei vor allem Chräft für d Notional- und Grossrotswahle im 2019 und 2020 sammle.