Dass Wettige spare muess esch scho lang es Thema, bsunders aber, sit d Stimmbürger s Budget 2020 a de Urne abglehnt hend. 2021 wird sich d Situation zuespitze.
Am Mittwoch, 8. Juli 2020 het de Gmeindrat d Präsidie vo de Parteie und de Iiwohnerrotsfraktione zueme Träffe iiglade. D Wettiger Finanze sind s Thema gsi, zum eine, will de Gmeindrat es erneuts Debakel a de Urne wot verhindere, zum andere wil die finanziell Situation eigentli e Stüürerhöchig erfordered.
Detaillierd hend de Gmeindamme Roland Kuster und de Finanzvorsteher Markus Maibach d Entwicklig vo de letschte und au vo de kommende Jahr hüt au de Medie ufzeiged, wi si es gester au bi de Partei- und Fraktionspräsidie gmachd hend. Nebe de höche Investitione, wo d Gmeind muess schultere, sind au Usgabe gstige, uf di d Gmeind kein Iifluss het, bsunders im Gsundheitswese. Allei dete sind d Choschte um 6 Stüürprozänt, also öppe 3 Millione Franke höcher wi im 2014. Dass de Stüürfuess gliichwohl numme moderat gstige esch, het mit diverse Iisparige z tue. Bis jetzt het de Gmeindrat versuechd z spare, ohne dass es de Bevölkerig z fescht weh tued. Das esch in Zuekunft nüm möglich. De Verzichtsplan mit Nullrundene bim Personal, de Verzicht uf Ahschaffige, einzelni Kulturbiträg, Strassesanierige, Ahpassig vo de Tarif bi Musikschuel und Tagesstrukture zeiged uf, wie me öppe e Million cha iispare. Damit esch fürs 2021 aber no kei usglichnigs Budget z erreiche. Dezue chömmed no di zu erwartende Stüürihbuesse und stigendi Sozialchoste wege de Corona-Krise.
D Parteiverträter hend d Verzichtsplanig positiv ufgnoh, schriibd de Gmeindrat i de Mediemitteilig. Au dass i de momentane Situation kein Schuldenabbau möglich sig, esch bim Träffe vo gester zur Kenntnis gnoh worde. En Erhöchig vom Stüürfuess fürs 2021 esch vo de Parteie mehrheitlich als kritisch erachted worde. We sich di aber ned lahd la vermiide, sig es wichtig, de Stimmbevölkerig ufzzeige, welli Sparbemühige unternoh worde sind, heissts ded witer. S Ziel vom Gmeindrat esch, dass alli Partei mitenand am gliche Strang ziehed, um Wettige finanziell stabil und gsund z bhalte.