De FC Wettige het hüt, Sonntig, 3. November 2019 d FC Eagles Aarau im Stadion Alteburg empfange. Nachere lange Siegesserie isch numm ein Punkt z Wettige blibe.
De bisherige Tabelleführer het im Stadion Alteburg d Eagles us Aarau empfange. De Platz isch wege de letschte Rägetäg eh scho ufgweicht gsi, aber scho bald nach Spielbeginn isch es no schlimmer worde. Zum Schluss het sich s Spielfäld in e Rutschbahn verwandled gha und ned numme d Linierichter sind immer wider im Matsch gschtande. Spielentscheidend isch s Terrain aber zum Glück ned gsi, obwohl s ei oder s andermol en Abwehrspieler, wo uf eme trockene Platz kei Probläm gha het, en Schuss oder en Pass abzfange, hüt eifach usgrutscht isch und sich so für de jewilig Gägner immer wider Chance ergeh hend.
De Match selber isch eigentli recht usgliche gsi und beidi Teams hend immer wider Torchance gha. D Wettiger Fans hend bis zum Schluss uf en Sieg ghoffd, au no, wo d Eagles in de 89. Minute en Spieler durch e roti Charte verlore hend. Aaschlüssend an den Platzverwiis isch es leider zu unschöne Szene cho und die schwarz spielende Aarauer hend en Teamkolleg muesse feschthebe, damit es ned zuere Tätlichkeit chunnd.
Aber au wo de Match wider aapfife worde isch, het es nüm für e Tor glangd und de FC Wettige und de FC Eagles Aarau hend sich miteme 0:0 trennd. D Wettiger sind vorerscht uf de 3. Tabellplatz zruckgheit, chönnted aber miteme Sieg im Nachtragsspiel gege NK Pajde wider an d Tabellespitze zruck kehre.