Badi-Saison 2019 esch verbii

De Marco Baumann hed eus brechtet über die vergangeni Badisaison und was bereits für welchi Vorbereitige laufed für d Iissaison.

Sit em Sonntig, 15. September 2019, nach em Fyrobig, esch s Schwümbi im Tägi zue. Trotz dem schöne Wetter vo anfangs Woche bliibt’s be dem, denn d Mitarbeiter send jetzt i die wohlverdiente Ferie. D Saison hed ned ganz s Rekordjohr 2018 chönne ihole, aber med ca. 55’000 Gäscht, inkl. de Minigolfaalag, esch s Tägi sehr z frede med de Saison. De absolut Rekordtag esch de 30. Juni gsi, med rund 4’000 Persone im Tägi-Provisorium.

D Vorbereitige vo de Iissaison send scho voll im Gang. I de letschte vier Woche sind Spielerbänk, Ziitrichterturm, Bande, Zueschauerplätz und veeles meh installiert und au ustestet worde. Demit, das alles bereit esch uf d Eröffnig am 17.November, esch vo de Bauleitig e Möglichkeit gschaffe worde, dass bereits jetzt es Provisorium hed chönne iigrechtet werde für e Umchleidekabine und e Schlittschue-Uusgab.

De Pascal Schelbert, zueständig für’s leibliche Wohl für’s neue Tägi, esch flissig dra, s Fondue-Chalet med de rechtige Mischig vo Chäs und Charme bereit z ha bis zom 17.November. Das Chalet esch au es Provisorium bis zom Endi vom ganze Umbau im Tägi. Öb s Chalet nachher bliibt bestoo, esch no ned ganz klar, aber veel säged, es bliibi.

D Minigolfahlag bliibt no offe, wenn’s Wetter stimmt. D Öffnigsziit send vo Mittwoch bis Sonntig vom Zwoi bis am Achti am Obig.

Meh informatione findet Ihr wie fast immer uf de Huus-sitte vom Tägi: www.taegi.ch