Sit bald emol 10 Johr isch d Gmeind mit de viir Grundeigetümer vom Bahnhofareal ineme kooperative Planigsprozess. Mit em Abschluss vo de öffentliche Mitwirkig für d Teilnutzigsänderig vo de Bau- und Nutzigsordnig (BNO) und em Gstaltigsplan folged jetzt di öffentlich Uflag.
Im Auguscht 2018 het s Mitwirkigverfahre nach §3 vom Baugsetzt aagfange gha. Bis zum 20. September 2018 hend Aaträg mit Begründig chönne iigreichd werde. 32 Privatpersone, 4 Firmene, 5 Verei, Gnosseschafte und Stiftige und 4 Partei hend sich iibrochd und insgsamt sin in dene 45 Mitwirkigsiigabe 189 Einzelaaträg gstelld worde. Themeschwerpünkt vo de Iigabe sind di baulich Dichti, de Verkehr, d Freirüüm und Umwältaspekt wie Lärm, Energie und Ökologie gsi. Mit zahlriiche Aaträg uf Erhaltig vo de Funktionsfähigkeit vo de Drehschiibe isch au es bahnspezifischs Thema wichtig gsi.
Am grundsätzliche Städetebaukonzept, wo usere Ideekonkurrenz ineme mehrjährige Prozess entschtande isch, het de Gmeindrot feschtghalte. De überarbeited Gstaltigsplan laht aber meh Spiilruum, um uf Forderige nach usdehnte Grüenflächene und spezifischi Nachbarschaftssituatione besser chönne z reagiire. Zudem isch di maximal Aazahl vo Parkplätz fürs Park & Ride vo maximal 100 uf maximal 80 reduziird worde und di fürs Bike & Ride vo mindescht 500 uf mindescht 600 erhöht worde. Für d Aazahl Parkfälder fürd Wohnnutzig isch en Obergränze iigführd worde und d Aazahl vo de zuelässige oberirdische Parkplätz a de Seminarstross isch reduziird worde. Au im Beriich Umwält het es Änderige geh.
Mit de geschtrige Medieorientiirig am Vormittag und de Infoveraastaltig am Abe isch jetzt de Startschuss für de nächscht Verfahresschritt gfalle. Sit em 3. Juni 2019 liged d Planigsentwürf bis zum 2. Juli 2019 öffentlich uf. Im Gegesatz zur abgschlossene öffentliche Mitwirkig sind jetzt numme no Iiwendige vo Betroffene mit schutzwürdige eigede Interesse mögli.
S gesamt Dossier cha me uf der Bau- und Planigsabteilig oder unter
www.wettingen.ch/entwicklungsplanung aaluege.