Noie Leiter für d Bau- und Planigsabteilig gwählt

Jlko Müller

De Gmeindrot het de Jlko Müller zum noie Chef vo de Bau- und Planigsabteilig gwählt. Er wird dodemit Nochfolger vom Urs Heimgartner.
Ab em 1. April 2019 isch d Leitig vo de Bau- und Planigsabteilig vo de Gmeind Wettige wider bsetzt und zwar mit em Jlko Müller, wo z Rombach läbt.
De Müller isch 47-jährig, ghürote und het drü schuelpflichtigi Chind. Nebe sim Bauingenieurstudium a de FH het er au es Nachdiplomstudium in Unternehmensfüehrig und en Executiv MBA vo de HSG z Sanggalle.
Er het 12 Johr ineme Unternähme mit 120 gschaffed, wo im Infrastrukturbau für Strosse tätig isch, dodevo 8 Johr in de Gschäftsleitig. Er het dete di operativ und finanziell Verantwortig i de Bereich Vertriib, Projäktleitig und Bauusfüehrig gha. Di letschte 6 Johr het er ineme Baumanagementbüro für Infrastruktur- und Hochbau als stellvertetender Gschäftsfüehrer gschaffed. Er het dete Mandat für Eigetümer, Bauherre und Generalunternehmer betroit.