De 4-Achser für de Werkhof chunnd no i dem Johr

Am 16. März 2017 het de Iiwohnerrot d Aaschaffig vomene 4-Achs-LKW für de Werkhof bschlosse. Ufgrund vo Verzögerige chunnd das Fahrzüüg erscht im 4. Quartal 2019.
Mir sind immer wider emol gfröged worde, was eigentlich mit em 4-Achser sig, für den de Iiwohnerrot in de Sitzig vom 16. März 2017 en Kredit vo meh wi 400’000 Franke gschproche gha het. De Werkhof isch nämli immer no mit em 2-Achser unterwägs, wenns im Iisammle vom Altglas oder d Usliferig vo de Fäschtbänk goht.
I de Zwischeziit isch de Vertrag mit Mercedes unter Dach und Fach und im 4. Quartal vo dem Johr wird s noii Fahrzüüg für de Werkhof parat si. D Vorfroid sig gross, so d Gmeindrötin Kirsten Ernst gegenüber de Wettiger Nochrichte. Mit em noie Fahrzüüg chönni de Werkhof dann au Arbeite überneh, wo me bisher het müesse fremdvergeh, was immer wider au zu Verzögerige gführt het.