Zum 27. Mol het d Gmeind ihri Sportler gehrt. Au de Berni Schär isch begeischtered gsi.
D Sportlerehrig isch i dem Johr ein ächts Erläbnis gsi. Dank de Unterstützig vo zahlriiche Sponsore isch es de Sportkommission mit em Gmeindrot Philippe Rey möglich gsi, en super Event uf d Bei stelle. Ufgrund vo de beiidruckende Ergäbnis vo de Sportlerinne und Sportler, absolut aagmesse.
Durch d Show het de us em Radio bekannte Sportmoderator Berni Schär gführt. D Zueschauerinne und Zueschauer sind beiidruckt gsi, wi akribisch und professionell er sich uf de Aalass vorbereitet gha het. Er het d Titel vo de Teams alli uswendig glehrt gha und für jedi Gruppe, wo uf d Bühni cho isch, het er es Video parat gmachd gha. Zudem het er vorher mit öppe us jedem Tem telefoniirt und sich so uf es kurzes Interview vorbereitet. Insgsamt sind 250 Sportlerinne und Sportler für ihri Erfolg verdankt worde, wo insgsamt 50 Goldmedaille gunne hend. Die meischte sind Schwiizermeischter worde, aber es het au Gwünner vo Europameischterschafte debi gha, wi d Karin Suter.
Di beide Show-Acts, wo d Ehrig ufglockered hend, sind vo eine vo de Uszeichnete, vortrait worde: Di 14-jährig Chelsea Fontenel, wo bi de Juniormeischterschaft im Tennis Gold gunne het, isch zweimol uf de Bühni gschtande und het zeiged, dass si au cha singe.
In de nächschte Täg werded uf sportler-ehrung.ch Bilder vo allne Mannschafte und Einzelgwünner ufgschalte, so dass me sich au dete en Iidruck vom Event cha verschaffe. Nebem Landhockeyclub Rotwyss , wo mit sine verschidnige Mannschafte vili Meischterschafte gunne het, wend mir vor allem d Sportler vo de Behindertesportgruppe Wettige hervorhebe, wo bi de Schwiizermeischterschaft im Schwümme uf sage und schreibe 13 Goldmedaille cho isch.
Allne erwähnte und nöd erwaähnt EInzelsportler und Teams oise härzliche Glückwunsch für die Topleischtige!
Herre- und Frauemannschaft vo Rotwyss sind Schwiizermeischter, d Manne uf em Fäld und i de Halle, d Frau i de Halle, beidi sind au Cup-Siger
D Behindertesportler hend 13 Goldmedaille bi de Schwiizermeischterschafte im Schwümme gunne
Chelsea Fontenel
Verschidnige Junioremannschafte vo Rotwyss mit zäme sächs Schwiizermeischtertitel im 2018
Zwei Kampfsportler sind Schwiizermeischter 2018 und d Karin Suter Europameischteri im Badminton
Lichtathlete vom LVWB
Seniore vom HC Wettige und d Volleyballerinne vo de Bezirksschuel sind Schwiizermeischter worde 
Drü Turnerinne vom STV hend de Schwiizermeischtertitel gunne
Wild Lacross Schwiizermeischter 2018