Am 15. Oktober 2015 het de Leo Scherer (WettiGrüen) es Postulat iigreicht. Er het vom Gmeindrot welle wüsse, welli Strahlebelaschtig es plötzlichs und vollständigs Versage vom Kernreaktor Beznau 1 hetti. D Antwort ligd jetzt vor.
Das Poschtulat isch sehr umstritte gsi, wo es am 19. Mai 2016 im Iiwohenrrot behandled worde isch. Us em Protokoll vo de damalige Sitzig cha me entneh, dass de Gmeindrot das Poschtulat het welle entgegeneh. D Fraktion FDP het aber de Aatrag gstellt, das Poschtulat zuruckzwiise und so isch es im Rat zuere Diskussion und aaschlüssend zurere Abstimmig cho. De Stichentscheid vom damalige Iwohnerrotspräsident Paul Koller het de Usschlag für d Überwisig vom Poschtulat geh, will es bi de Abstimmig mit 21 Ja zu 21 Nei bi einere Enthaltig zumene Patt cho isch.
In sinere Antwort uf d Froge, wo de Poschtulant gstellt het, bezieht sich de Gmeindrot uf d Antwort, wo s ENSI uf es identischs Poschtulat in Bade geh het. Demnach isch es vollständigs Versage vom Reaktordruckbehälter uszschlüsse. We me aber gliichwohl d Folge wot aaluege, dann müesst jede Iiwohner (ja nach Windrichtig und Windgschwindigkeit sind d Szenarie no einisch z unterscheide, aber realistisch betrachted wär e radioaktivi Wolke innerhalb vo drü Stund do), wo sich innerhalb vomene Huus ufhalt, in de erschte zwei Täg mitere Strahlebelaschtig vo 10 mSv rächne. Bimene Ufenthalt imene Keller, währed es 2 mSv und imene Schutzruum bi 1 mSv. Für d Folge über en Ziitruum vo 50 Johr het s ENSI kei quantitaivi Ussag chönne träffe, will es dafür konkreti Messwert brüchtig.
Ob de Leo Scherer und de Iiwohnerrot mit dere Antwort z fride sind, wird sich bi de nächschte Iiwohnerrotssitzig am 17. Mai zeige, wenn das Poschtulat im Rot behandlet wird.