Am Donnschtig, 11. Dezember 2025 isch di letscht Iiwohnerrotssitzig vo de Legislatur gsi. S einzig Traktandum sind Abschied gsi.
Scho we me de Saal obe im Rothuus betrete het isch, isch ufgfalle, dass vieles anders isch wi schuscht. D Tisch sind anderscht aagordnet und festlich gschmückt gsi. De Iiwohnerrotspräsident Christian Oberholzer isch allei vore gsi und meischt gstande statt gsesse und d Musikschuel isch miteme «Grossufgebot» aawesend gsi.
D Iistimmig i de Abe isch musikalisch gsi und het Flöte mit Akkorden, Violine mit Flügel, d Iiwohnerrötin Ema Savic elei am Flügel und Saxophon umfasst. Aaschlüssend het de Christian Oberholzer di abtretende Iiwohnerröt nach Amtsduur verabschiedet, aagfange mit em Fritz Zanzerl, wo sit em Mai im Iiwohnerrot gsi isch, bis zum Leo Scherer, wo es uf unglaublichi 35 Johr brochd het. Nebe dene beide verlönd au de Daniel Brüllmann, de Peter Lütolff, de Roger Scherer und de Alain Burger de Iiwohnerrot. Au verabschiedet worde sind de Christian Wassmer und de Orun Palit, wo in Zuekunft als Gmeindröt an de Sitzige vom Iiwohnerrot werded teilneh. Es hend nebem Iiwohnerrotspräsident au di jewilige Fraktionspräsidente s Wirke vo de Abträtende gwürdiged
Danach sind dann drü Gmeindröt verabschiedet worde, da debi sind au de Vizeamme und de Gmeindeamme gsi. Z erscht het de Roland Kuster de Sandro Sozzi und de Vizeamme Markus Maibach verabschieded, danach de Vizeamme de Roland Kuster. Es isch dütlich worde, mit wieviel Herzbluet sich alli für Wettige iigsetzd hend.