Am Donnschtig, 11. Dezember 2025 het de noi gwählti Gmeindrat, wo ab em 1. Jänner 2026 im Amt isch, sini konstituierendi Sitzig abghalte. Dodebi sind d Ressort verteilt worde.
Bi de Verteilig vo de Ressorts vom Gmeindrot hets us oisere Sicht kei Überraschige geh. Di bisherige Gmeindröt Philippe Rey, Kirsten Ernst und Martin Egloff hend ihri Ressort bhalte. D.h. au in Zuekunft wird de Philippe Rey für Gsellschaft, Kultur und Sport verantwortlich si. Sini Stellvertretig übernimmt de Orun Palit. D Kirsten Ernst blibt für de Tüüfbau und de Vercher zueständig, wobi si vom Martin Egloff verträte wird, wo widerum d Veramntwortig für de Hochbau dued bhalte. D Kirsten Ernst isch sini Stellverträteri.
Dass de Markus Haas als Gmeindamme sis bisherigi Ressort Soziales und Gsundheit würd abgeh, isch au kei Überraschig. Wi scho sin Vorgänger Roland Kuster übernimmt er aber ned d Finanze, sondern het di gliiche Ressorts wi de Roland Kuster bisher: Präsidials inkl. Ortsbürgergmeind, Sicherheit und Planig. D Stellverträtig für s Präsidiale ligd logischerwis bim Vizeamme Christian Wassmer, bi de Sicherheit und de Planig isch es de Philippe Rey.
Mit meh Spannig hend mir und wohl au oiseri Läserinne und Läser uf d Ressortverteilig bi de drü noi gwählte Gmeindröt gwartet. D Lilian Studer übernimmt s bisherige Ressort vom Markus Haas und isch für Sozials und Gsundheit verantwortlich, de Christian Wassmer übernimmt s Ressort Bildig und de Orun Palit Finanze. De Christian Wassmer isch debi de Stellverträter vo de Lilian Studer ihrem Ressort, de Markus Haas bi de Finanze und d Lilian Studer bi de Bildig.