E Fusion vo Wettige mit de Nachbarstadt Ännetwettige isch immer Mol wider es Thema gsi, aber isch au wider schnell vo de Traktandeliste verschwunde. Isch es Ziit, en Zämeschluss no einisch z diskutiere?
En Zämmeschluss zwüsche Ännetwettige, Wettige und witere Nachbargmeinde isch immer Mol wider Thema. E Motion, wo de Alain Burger im 2014 im Iiwohnerrot iigreicht het, isch genau so gschitered wie de Verein Traktandum 1, wo im 2015 gründ und im 2021 ufglöst worde isch. Dütlich für e Fusion zunere grosse Regionalstadt isch schints numme s Badener Tagblatt, wo au aktuell wider s Thema Grossfusion ins Spiel bringt, nachdem bi de Gmeindversammlung z Noiehof di Frag vonere Fusion mit Ännetwettige gstellt worde isch.
Aber was wäre d Vor- und Nachteil für Wettige, wenn es en wichtige Teil vonere Stadt würd werde, wo 60‘000-100‘000 Iiwohner chönnd ha?
Spontan fallend ois als Vorteil de tüüfer Stüürfuess und di dütlich tüüfere Schulde ii, wo en Zämmeschluss mit sich bringe däd. Zudem wär d Verchersplanig, eini vo de gröschte Useforderige vo de Region, eifacher. En Nachteil wär di im Gegesatz zu de schlanke Verwaltig z Wettige, ehnder überdotierti und dodemit tüüri Verwaltig z Ännetwettige.
Wo gsend ihr Vor- und Nachteil? Schriibed ois an wettiger.nochrichte(at)gmail.com.