Gfüehlt sit immer, het D Mitti s Präsidium vo de Finanzkommission (Fiko) bsetzt, bis zum überraschende Rücktritt vom Thomas Benz Ändi 2022. Jetzt möcht d Partei s Präsidium weder zrugg ha.
Wo de Thomas Benz Ändi 2022 us em Iiwohnerrot und dodemit au us de Fiko und vom Präsidium vo dere Kommission zruckträte isch, isch D Mitti ned parat gsi, öpper für s Präsidium vo de Fiko z stelle. Im Jänner 2023 het de Iiwohnerrot zwöimol de Leo Scherer zum Präsident gwählt, der het d Wahl aber zwöimol abglehnt, wil er das jewils sehr knappe Ergäbis als Demüetigung empfunde het. Bi de nächschte Iiwohnerrotssitzig isch damals denn de Adrian Knaup (SP) zum Präsident vo de Fiko gwählt worde.
Für die noi Legislatur, wo im Jänner 2026 started, het D Mitti jetzt dütlich gmachd, dass sie ned im Sinn het, de bisherig Präsident im Amt z bestätige, sondern s Fiko-Präsidium selber möcht. Vorgschlage wird vo de Fraktion de Roland Brühlmann, wo, wie de Adrian Knaup, d Wahl i de Gmeindrot, trotz erreiche vom Absolute Mehr, verpasst hed.