I de Nacht uf Mentig het sich en Autofahrer z Würelos ere Verkehrskontroll welle entzieh und isch mit hohem Tempo i Richtung Wettige gflohe. Bim Wiichreisel het er d Kontroll über sis Auto verlore und isch bim Fresh Food ins Fänschter ine gfahre. De Lenker und zwei Mitfahrerinne sind debi verletzt worde.
Am Mentig, 13. Oktober 2025, churz nach de Eis, het e Patrouille vo de Kantonspolizei (Kapo) uf em Rastplatz z Würelos e Vercherskontrolle duregfüehrd. En wiise Opel het sich de Kontrollstell gnöchered, abebremsed und isch dann aber über d Sperrflächi zrugg uf d A1 in Richtig Bärn gfahre. De Fahrer het starch beschlüniged und d Polizei het d Verfolgig ufgno.
Bi de Usfahrt Wettige-Ost isch de Opel denn ab de Autobahn und esch uf de Furttalchrüzig links Richtig Wettige witergfahre. E zwöiti Patrouille het sich bim Wychreisel positionierd. S flüchtige Fahrzüüg isch mit höcher Gschwindigkeit uf de Gegefahrbahn d Landstross abe cho. Im Chreisel het de 22- jährig Fahrer d Kontrolle über s Auto verlore, isch über d Mittelinsle gfahre und het d Schaufensterschiibe vom Fresh Food durchbroche. S Auto isch denn im Lade zum Stillstand cho.
De Lenker, en 22-jährige Öschtriicher und sini 26-jährigi öschtriichischi Bifahreri hend sich mittelschweri Verleztige zuezoge. E 65-jährigi Mitfahreri us Serbie het liechti bis mittelschweri Verleztige erlitte. Alli drü sind mit de Ambulanz ins Spital brochd worde.
Durch d Kollision esch s Verchaufsgschäft stark beschädiged worde, am Auto esch Totalschade entschtande. Wägeme Wasserleitigsbruch het d Füürwehr au müesse uusrucke und d Büs hend müesse umgleitet werde.
Em Fahrzüüglenker esch vor Ort de Füehreruswiis abgnoh worde. Warum de Maa gflohe esch, esch im Moment no ned klar. D Kapo het d Ermittlige ufgno.
Do gshend ihr s Video vo de Überwachigskamera im Lade: