Für d Wahle vom Gmeindamme hend mir allne drü Kandidate di gliche Froge gstellt. Do sind d Antworte vom Adrian Knaup (SP).
WN: S Oberstuefezentrum wird tüürer, wi ursprünglich planed. Wie stohsch du zum Masterplan Schuel?
Adrian Knaup: De Masterplan Schuel stoht für en guet ufgleiste Prozess zur Schuelrumplanig unter Mitbeteiligung vo allne: Bevölkerig, Schuel, Bau+Planig, Politik. S Ergäbnis und d Stossrichtig mit emene Oberstufeschuelhus isch breit abgschtützt und dokumentiert. Ich bin wie alli nid mit allem voll iverstande und han gwüssi Bedänke. Aber ich bin überzügt, dass mer öpis guets anebringed. Mir müend eus bewusst si, dass das en grosse Wurf isch für d Bildig in Wettige. Das chan nid billig si. Aber au uf d Chöschte wird im Prozess laufend gachtet.
WN: De Bevölkerigsdruck im Limmattal isch höch und d Miete stiiged. Ohni zuesätzliche Wohnruum würdi d Nachfrag no mehr stiige, gliichzitig isch d Inneverdichtig ned sehr populär. Wo positioniersch du dich in dem Spannigsfeld?
Adrian Knaup: Es isch grundsätzlich es guets Zeiche, dass Lüt nach Wettige cho wänd: mir sind en attraktivi Gmeind. Wohnrumsituation und Mietprise sind zum grosse Teil tribe vo de Abüter. Au in Wettige wird Wohnrum für Spekulation und Rendite brucht. D Gmeind sälber het nur beschränkt Iflussmöglichkeit. De gröschti Hebel isch d Bau- und Nutzigsordnig, wo jetzt neu gmacht wird. Det müend gwüssi Vorgabe drin si, wo uferloses Renditebaue ischränkt und e gsundi Entwicklig vo Bevölkerig und Gwerb ermöglicht.
WN: Wettige het höchi Schulde, aber es stönd witeri Investitone aa. Welli Lösige gesehsch du, damit d Schulde ned vo de nächscht Generation müend zahlt werde?
Adrian Knaup: Mer hends leider scho vermasslet: D Schulde hemmer bereits de nöchschte Generation zum Begliche überloh. Mehr hend z lang so to, als würds mit weniger Gäld go. Mir sind kläglich gschitered und de Schuldebärg stigt immer meh statt chliner z werde. Mer gseht aber au, dass immer meh das erkänned und bereit sind, für ihres Wettige wieder das z zahle wos brucht zum Erhalt.
WN: In eim Satz: Warum set me usgrächnet dich als Amme wähle?
Adrian Knaup: Mir müend in Wettige nid alles uf de Chopf stelle und neu erfinde, sondern wieder meh und stärker am gliche Strick zieh: für das bin ich de richtig Gmeindamme.