Di erschti «Langi Nacht vo de Chilene» het im Aargau im 2016 stattgfunde und het in de Zwüscheziit au in anderne Kantön Verbreitig gfunde. Di Reformiert Chile Wettige-Noiehof macht nach eme Unterbruch in dem Johr wider mit.
Die «Langi Nacht vo de Chilene» het im September 2016 ihre Wäg vo Öschtriich in d Schwiiz gfunde. D Idee, Chile emol anderscht z präsentiere und z zeige, hend di Aargauer Landeschilene ufgriffe und scho am Aafang sind au di Wettiger Chilegmeinde beteiliged gsi. Au im 2018 sind di Chilegmeinde wider debi gsi, während im 2021 und im 2023 di Reformierte ned mitgmachd hend und die Katholike, sowit mir ois erinnered, numme es abspeckts Programm in de Chloschterchile gha.
Morn, Fritig, 23. Mai 2025 isch di föift Usgab vo de «Langi Nacht vo de Chilene» in de Schwiiz, wobi 18 Kantön respektiv kantonali Landeschilene debi sind. In Wettige git es , nebe de Maiaadacht vo de KAB in dem Johr au es Programm vo de Reformierte Chile. Ab de 7ni am Abe gits es feins Chili con carne+verdura im Grosse Saal vom Chilegmeindhuus und ab de 8i Kafi mit eritreische Kafizeremonie und es Chuechebuffet, . De ganz Abe gits es Chinder- und Jugendfilmprogramm und um Halbizehni cha me in de Chile en Stummfilm mit Liveorgelmusik von Benjamin Guélat luege und losse.