De Handels- & Gwerbverein Wettige het am 3. April 2025 in de Wyproduktionshalle vo Steimer Wybau sini GV gha. De HGV het dodebi u.a. d Fusion mit dem Gwerbverein Noiehof bschlosse.
Ufgrund vo gsamtgsellschaftliche Trends isch es für vili Verein schwirig, ihri Vorständ z bsetze. So isch es au em Gwerbeverband Noiehof gange. Us dem Grund isch de Vorstand vom Gwerbverein Noiehof uf de Vorstand vom HGV Wettige zuecho und het gfröged, ob e Fusion möglich sig. De Wettiger Vorstand het das Aalige entgegegnoh und nach juristische und anderne Abklärige entschiede, bi er GV d Fusion mit Noiehof z beaaträge.
Nach ere churze Diskussion het d GV vom HGV Wettige de Fusion mit 8 Gegestimme und 5 Enthaltige bi 79 aawesende stimmberechtigte Mitglieder zuegstumme. Als nächschtes isch e usserordentlichi Fusions-GV vorgseh , wo en gmeinsame Vorstand gwählt und de Name vom fusionierte Verein bschlosse wird.