Es international tätigs Unternehme isch an ere Aasidlig z Wettige interessiert. Zwüsche 2030 und 2040 chönnted so 3’000 Arbeitsplätz entstah uns signifikant höcheri Stüürerträg.
Dass es mit de Wettiger Finanze ned zum Beschte stoht, isch keis Gheimnis. D Situation chönnd sich aber dütlich verbessere, wie d Iiwohnermeind mitteild. Bis da anne sind aber no einigi Hürde z neh.
Konkret gohts um es Industrieunternehme, wo scho an anderne Ort in de Schwiiz tätig isch und sin Firmehauptsitz chönnd auf Wettige verlege. Nach aktuelle Berechnige würd d Gmeind vo Unternehmensstüüre in Höchi vomene zwöistellige Millionebetrag profitiere, was aktuell meh wi 20 Stüürprozent entspricht, während kei allzuhöche Investitione notwendig siged, schriibd d Gmeind.
Es goht um Flächene vo gsamthaft 100’000 m2 östlich vom Tägi (Parzelle 789 und 3271), wo de Ortsbürgergmeind ghöred. D Ortsbürger werded in ere usserordentliche Versammlig am 22. April entscheide, ob si ere Abgab vom Land im Baurächt wend zuestimme. Danach muess e Teilrevision vo de Bau- & Nutzigsordnig erfolge, an Aapassig vom kantonale Richtplan und es bruuchd e paar witere planerische Arbeite.
D Lag so nöch a de Autobahn isch en grosse Vorteil bi de Erschlüssig vo de Parzelle und es würd us em Ushueb so viel Kies wie möglich gwonne werde.