Am Samschtig, 1. März 2025 hed d Chenderfasnacht chönne stattfinde. Dank de zahlriiche Spende via «Lokal Helden/Heldinnen» und private Sponsore, händ d Räbeschläcker, de Dameturnverein und d Männerrige de Umzug und de Ball chönne vorbereite und durefüehre.
D Vorfreud isch gross gsi, wo sich d Chend und d Erwachsene einzel, paarwiis oder in Gruppe ab de Eis am Mittag auf em Rathuudplatz für de Umuug aagmeld und dann ufgstellt hend. Debii heds veel aktuelli Themene gha. «Ab zum Mars», «Wettiger Fasnacht blüeht», «Baustelle z Bade» oder aber au s Baue generell. Au Geister, Pirate und Papagei, Pardiesvögel, Hüehner, Drache, Skifahrer, Pippi Langstrumpf, Polizischte, Ägypter, Zältli, Roboter, Fee und und und.. send debii gsi. De Umzug esch denn au nach de Zwoi losgange Richtig Landstross. Begleitet vo 3 Gugge: Gastgeber und Umzugsfüehrer sind d Räbeschläcker gsi. D Bräusivogel us Spreitebach, wo weder fantastische Maske gha hend, sind d Mitti gsi und d Schnüfler, wo Ihres 60-jährig Jubiläum fiired, mit em Motto «als Ovo chasch es ned besser aber länger», am Endi vom Umzug. Es hed au zahlriichi Zueschauer entlang de Umzugsroute gha, gfüehlt so veel wie scho lang nüm! De Abschluss esch wie gwohnt uf em Areal vo de BEZ gsi. Det heds Spiiss und Trank gäh, Konzert vo de Guggene und die beschte Maskene send userkohre worde.
En grosse Dank vo dene veele Bögge und Zueschauer, god a die drü Verein und d Spender und Sponsore, wo die Tratition «Wettiger Chenderfasnacht», für das Johr nomol hed chönne rette, das ohni Unterstützig vo de Gmeind Wettige!
unter folgendem Link findet Ihr Bilder dezue .. https://myalbum.com/album/PC2h5UvwcFQbf9/