Am Donnschtig, 30. Januar 2025 isch di erscht Sitzig vom Iiwohnerrot vo dem Johr gsi. Nebe de Sanierig vo de BEZ-Turnhalle, ere Stellvertretigsregelig für de Iiwohnerrot und ere Kreditabrechnig isch es au ums Budget 2025 gange.
Aagfange het d Sitzig mit eme Rücktritt. D Sheena Heinz vo de FDP isch zum letschte Mol im Rot debi gsi. Zudem sind mit de Eveline Isler und em Reto Amherd zwöi noii Iiwohnerröt für «Die Mitte» in Pflicht gnoh worde.
Wil d Stimmbürger s Budget 2025 im November abglehnt hend, het de Iiwohnerrot no einisch drüber müesse befinde. Würkli Spannig het niemed erwartet, au wil de Gmeindrot mit em Verzicht uf d Vorfinanzierig vom Oberstuefezentrum es usglichnigs Budget bi gliichblibendem Stüürfuess het chönne vorlege. D Fraktion SP/WettiGrüen het gliichwohl oder grad us dem Grund e Rückwisig vom Budget gfordered, zum de Regierigsrot lah drüber befinde. D Hoffnig isch gsi, dass de Regierigsrot s Hushaltsgliichgwicht nüm gwahrt gseht und us dem Grund de Stüürfuess wird erhöhe. Alli andere Fraktione hend liber s Heft selber in de Hand welle bhalte und hend das Budget mit wenige Änderige aagnoh. Im März muess dann s Stimmvolk no zuestimme, damit d Iiwohnergmeind au ned gebundeni Usgabe cha tätige.
Zu Diskussione het d Stellvertretigsregelig gführt und au d Frog, was me alles muess mache, damit d BEZ-Turnhalle witerhin cha bruuchd werde. D Stellvertretigsregelig isch dann mit grosser Mehrheit gnehmiged worde und au d BEZ-Turnhalle cha instandgstellt werde, wobei de Iiwohnerrot uf Aatrag vo de Finanzkommission de Kredit um 100’000.- Franke chürzt het. De Chürzigsaatrag vo de Mitti, wo 200’000.- het welle striiche, het kei Mehrheit gfunde.
Zum Schluss isch noch e Kreditabrechnig gnehmiged worden und chutz ab de 9i am Abe het de Iiwohnerrotspräsident Christian Oberholzer d Sitzig chönne beende.