Au im 2024 häd de Rotary Club Wettige en Suppetag veranstaltet. Am Donschtig 24. Oktober 2024 esch de erfolgriich uf em Rathuusplatz duregfüehrt worde.
S Wetter hätti ned besser chönne sii! So send de über Mittag sämtlichi Plätz im Zelt aber au sämtlichi Plätz vor em Zelt uf de Festbankgarniture dusse bsetzt gsi.
I dem Johr send ca. 200 Liter Suppe vom Tex Mex, vo de Vecchia Posta, vom China City und vom Casino koched worde. Das hed rund 500 Protione ergä.
Nebe dem Suppeangebot heds Wy, Bier und es grosses Chuechebuffet gäh.
Alles in allem send i dem Johr 9000.- Franke als Spend zäme cho. De Rotary Club Wettige spändet de Betrag as HOPE in Bade.
De Rotary Club Wettige bedankt sich herzlich be allne Sponsore und Helfer.