Grad emol im Vorus: Ich liebe mini Familie vo ganzem Herze! Es git i mim Läbe nüüt, wo vor
dem verruckti Huufe chunnt; ussert, vellecht no eusi beide Chatze? Nei,
denn au die ghöred zum Clan!
Wiehnachte bi eus findet traditionell am 25. Dezember i eusem
gmüetliche Häxehüüsli statt. Vorgängig werd öber de Familiechat s Menu
bestumme. Ond do fanget die erschte Problem scho mol a! Denn all
send i dem Chat, ussert eis Paar, wo sech strikt degäge wehrt. Also wird
hin ond her Chatet, gmailt, telefoniert met de Hoffnig, no vor em 25.12
es passends Menu finde. I dene Momänt ben ich nöd trurig, dass ich
einigi grad emol zwoi höchschtens drüü Mol im Johr xehne. Ich finde.
das längt vollkomme.
Bim Gschänkli mache hämmer eus eigentlich druuf geinigt, :»Mer
schänket enand nüt, gäll.»
Die Einzige, wo sech dra haltet send min Maa ond ich! Also wird nach
weder langem hin ond her nume jewiels Päärliwies gwichtlet. Ich ben jo
gspannt, wer sech au wörklich a die Wichtelgschänkli haltet!
Das Johr hämmer denn doch au no es Menu chönne zämestelle:
Nacheme Wintersalötli vo de ältere Schwöschter, wird min Maa, egal bi
welne Temperature, d Kalbskotteletts am Stück uf em Cheminee im
Garte brutzle. Ich hoffe för de Claudio, dass es ned grad Chatze haglet!
En feine Härdöpfekgratin met Bohnehüfeli wird euses gliebte Mami usem
Bärnbiet bringe.
För de Wy esch natürlich au sorgt: Es werdet nome die feinschte Tropfe
us de Wettiger Räbberge ufqmacht.
Zur Verdauig gots denn no vor em Dessert a die fröschi Luft zum
Wiehnachtslieder singe. Min grossi Brüeder begleitet es traditionell uf
sinere Trompete.
De Nachtisch vo de Schwögerin esch wie jedes Johr emmer en
Öberraschig ond en Sünd wert!
Ond am Tisch wird öber alles diskutiert:
Die letschte Erlebnis uf Reise, d Problem bi de Arbet, d Sörgeli und
Ängscht bim älter werde…all werdet ernscht gno, au emol fescht
umarmt, aber s Wichtigschte bi eus:
Es esch fröhlich!
Liebi Läserschaft, ich hoffe, ehr händ öber min Bietrag es bitzeli chönne
schmunzle. Gots denn ned de meischte Familie glich? Nämed nöd alles
zu ernscht, öberlächlet au emol en negative Komentar ond send lieb
zunenand.
Herzlichscht Ursi Depentor