De Chlausiizug signalisiert, dass d Wiehnachtsziit dütlich vor de Türe stood. Am Samschtig 2. Dezember esch es so wiit.
Zum Chlausiizug treffed sich de Chlaus med sini Schmutzli und Esel, sowie mit Sack und Pack, am Samschtig am Halbiföifi am Namittag vor de Chele St. Anton z Wettige. Det send alli herzlich willkomme, zom em Chlaus zuezlose, was er z verzähle hed und veelecht sech lo inspiriere vo Ihm, wie me Guets cha tue. Natürlich hed de Chlaus au Freud ame Veresli oder Liedli. Es ged au Glüehwy und Grittibenze und e schöni Istimmig uf d Wiehnachtsziit. Die wo no möchtet chönd im Aaschluss no de Gottesdienst bsueche.