Judihui, höt nimmt mech mini Bsitzerin met zum go Poschte! Ond will in Wettige eigentlich fascht alles ohni Auto chasch mache, gömmer z Fuess! De Poschtizettel esch gschrebe, d Schueh send bunde, höt gots ab i d Migros a de Landstross… Natürlich wählt mini Poschtiwägelibsitzerin grad de chürzischti Wäg, und schwups, het sie de Self – Scanner i de Hand! Min Buch wird gfüllt met de beschete Sache, wo mer im Lade bechunnt….doch oh Schreck! Die Priese send jo gschtege! Öb das mini Poschtiwägelifrau au scho vor em Zahle metbecho het? Es wörd mi jo mol Wunder neh, wieso ond met wellne Argumänt die Produzänte uf einisch die Priese eso chönd in Himmel ufe jage, ohni emene ersichtliche Grund….äxgüsi, aber de Chrieg i de Ukraine esch weiss Gott ned a allem Schuld. En Familie, wo uf s Gäld mues luege, mues jetzt aber wörkli langsam de Foifer ohni s Weggli poschte. Lüüt, wo führt das äne?! Wenn das eso wieter got, denn nimmt mini Poschtiwägelibsitzerin glie nome no es Chörbli id Gschäft vo Wettige zum fülle met. Und ich stohne ganz ellei ond vergässe ergendwo imene Egge im Chäller omenand ond wird bim nächschte Flohmärt uf em Rothuusplatz för en Foiflieber verchauft…
Gastbitrag vo de Ursi Depentor