S Wettiger-Fäscht esch bereits weder Gschicht. Gester Sonntig, 9. Juli 2023 esch es bereits weder friedlich z End gange.
S Wetter hed so öppis vo mitgmacht, de einte esch es scho fast e chli z heiss gsi, wie mer hed chönne ghöre uf em Festareal. De Restart nach vier Johr hed einigi Veränderige brocht. So send 3 «Traditions-Verein», d Spanier und de HC Wettige gar nümm am Start gsi. Au de Käferclub Limmattal, med de feine Langos hed mer vergäbe gsuecht. Veel Verein, wo aber zum guete Glück das Johr no z finde gsi send, händ ihres Konzept ahpasse müsse. Grund: be Allne hed mer chönne vernäh, dass Ihne d Lüt fehled wo helfed! Es hed aber au neui Teilnehmendi debii gha, so esch i dem Johr de Biergarte vo de LB uf de Zentralstross gsi und uf em Sportplatz esch be Rave-On ordentlich Party abgange med bekannte DJ’s. Dank grosszügiger Unterstützig dur eusi Kantonsbank hed au s Open-Air das Johr weder chönne stattfinde und das sehr zur Freud vo de zahlriche Bsuecher uf de Wiese. Au s Line-Up hed sech chönne zeige lo, wo med de Caroline Chevin en Hammer Abschluss gha hed.
ps.: es ged Sache wo verloren gange gönd, es ged Sache wo eifach mitgno werdet wo eim ned ghöred. De Finder wo so Sache findet, dene es herzlichs Dankeschön für’s abgäh, und e grossi Bitt a die Andere .. wo das Entwendete weder sölled zrugg gä =;O)
Mer chönnt gspannt sii wie sech das Wettiger Fäscht im nöchste Johr präsentiert.