Uf de Bernau z’Wettige stiigt am Wocheändi en sportliche Höheponkt: Bevor d’Dame öber Oschtere im Europacup speled, gilts för d’Juniorinne ond d’Juniore vo RotWiss Wettige ide Kategorie U14 ond U16 ernst.
S’Internationale Nachwuchsturnier stoht a ond d’Wettiger Mannschafte werded sich mit Gegnerinne ond Gegner us Dütschland ond de Schwizer Nationalmannschaft vode U16-Meitli messe. Ide letschte Johr vor de Corona-Pandemie hät das Turnier emmer im Tägi ide Halle stattgfonde. Neu werded d’Spiel ufem Fäld ustreit, det wo s’Landhockey eigentlich deheime esch ond, wie’s de Name au seid, herchonnt. D’Gäscht us Dütschland chömmed usem Wältmeischterland 2023 – spannendi Spiel send also garantiert!
Gespelt werd am Samschtig abem Nüni, am Sonntig abem Viertelabachti. D’Zueschauerinne ond d’Zueschauer dörfed sich nöd nome ufs sportliche Spektakel ufem Spielfäld freue, sondern au e Fäschtwirtschaft esch parat, damit d’Gäscht sich während em Ufenthalt uf de Bernau rondom wohl fühled. S’Gsellschaftliche ghört genau so dezue, wie die sportliche Leischtige. De Nachwuchs vo RotWiss Wettige werd sich freue, wänn möglichst vel Lüüt de Wäg uf d’Bernau fended ond d’Wettiger Nachwuchs-Cracks luuthals onderstötzed
Witeri Infos gits auf de Website vo Rotwyss.