Am frühe Mittwochmorge isch es uf de A1 bi Wettige zuere Streifkollission cho. Eis Auto isch ohni aazhalte witergfahre. D Polizei suecht Züüge.
Es isch am Mittwoch, 8. März 2023 öppe um Viertelvorsibni am Morge gsi, wo e Lenkeri mit ihrem blaue Mitsubishi Colt uf de A1 Richtig Züri unterwägs gsi isch. Vom zwöite Überholstreife her het si öppe uf de Höchi vom Aaschluss Wettige-Ost uf di mittler Spur welle wächsle, während glichzitig es anders Auto vo de Normalspur uf de Mittelstreife het welle. Beidi Fahrzüüg sind sitlich zämmegstosse und zumindest am Mitsubishi isch de Schade erheblich. Die unverletzti Fahreri isch mit ihrem Colt uf de Parkplatz vo de Raststätt Würelos gfahre, zum ufs ander Fahrzüüg warte. De wiis oder silbergrau Chliwage isch aber ned cho sondern isch schint unbekümmered witergfahre.
Di Mobil Polizei z Schafise (Telefon 062 886 88 88) suecht de Chliwage und Augezüüge.