In de Nacht vom 23. uf de 24. Dezember 2022 hend im Alteburgquartier drü PW brönnd. Au e Garage isch betroffe gsi.
Am Samschtig, 24. Dezember churz vor de Halbizwöi i de Nacht isch en Brand vonem Fahrzüüg a de Kollerstrass gmeld worde. Churz druf hets witeri Meldige geh, dass drü Fahrzüüg brönned und au e Doppelgarage grad denebe.
D Füürwehr isch mit eme Grossufgebot aagrückt und het s Übergrife ufs Wohnhuus chönne verhindere. Verletzt worde isch niemed. De Usmass vom Schade isch no ned klar, aber er dörft gross sie, schriibd d Kantonspolizei innere Medienmitteilig. D Ursach vom Brand wird ermittled. D Kapo suecht Lüt, wo verdächtigi Beobachtige gmachd hend. Die selled sich bi de Kapo bim Stützpunkt Ännetwettige (Telefon 056 200 11 11) melde.