Nach zwöi Jahr Unterbruch het 1. August-Fiir im traditionelle Rahme chönne duregführt werde. D Aasprach het d Grossratspräsidenti Elisabeth Burgener ghalte.
Nachdem d 1. August-Fiir wege de Pandemie im 2020 abgsaid worde und im 2021 in anderem Rahme duregführt worden isch, het si i dem Jahr im normale Rahme chönne duregführt werde. D Chuchimanne hend s Risotto choched, d Harmonie Wettige-Chloschter und d Tamboure hend de musikalisch Part übernoh. De Service het in de Verantwortig vom Blasorchester Bade-Wettige glege und d Feschtaasprach het d Grossratspräsidenti Elisabeth Burgener ghalte.
Ganz voll ischs Zelt ned gsi, wo de Gmeindamme Roland Kuster nach em Konzert vo de Harmonie und de Tamboure d Bevölkerig und d Fäschtrednerin het chönne begrüsse. D Elisabeth Burgener isch in ihre Red uf en virtuelle Chileturm z Wettige stige und het verzählt, was si vo do us gseht. D Froid isch bi de Bsuecher, aber au bi de Musiker spürbar gsi, dass de Anlass endlich wider het chönne stattfinde und d Harmonie het erscht nach zwei Zuegabe dörfe höre.