Z Spreitebach het am Sunntig, 29. Mai 2022 en Grossbrand im Industriequartier geh. Au d Füürwehr Wettige isch dete im Iisatz gsi.
So en grosse Brand erlebed au erfahreni Füürwehrlüüt selte oder nie. Mindescht 6 Füürwehre us em Limmattal sind z Spreitebach im Iisatz gsi, zum de Brand unter Kontrolle z bringe. Bsunders uffällig isch di starki Rauchentwicklig gsi. Bis uf Aarau und lut 20 Minute sogar z Frauefäld het me d Rauchsüüle gseh.
De Grund isch gsi, dass in de Lagerhalle, wo brönd het, nebe Bauschutt au Bitume glagered gsi isch. De Rauch het d Löscharbeite schwirig gmachd. D Füürwehr Wettige isch mit mehrere Fahrzüüg im Iisatz gsi, do drunter au de Hubretter und s ULF.
Siebe Persone hend e Rauchgasvergiftig becho un vier devo hend ins Spital müesse.
Betroffe gsi sind mehreri Gebäud und au Lastwäge, wo dete parkiert hend, sind usbrönnd. Die meischte vo de öppe 100 Füürwehrlüt hend am Sunntigabe wider chönne de Brandplatz verlah, wils Füürwehr glöscht gsi isch. Wie üblich, isch aber e Brandwach do blibe, zum allfälligi Gluetnester chönne z bekämpfe.
Funkeflug hets bis über d Autobahn geh und es isch um 6i no ned klar gsi, ob d Autobahn muess gsperrt werde. Stau hets dete in Richtig Bärn einewäg geh.